Xikoya kochirilgan. . .
Muallif: Tom Pacheko .
Mark Osborn xonasidagi kresloda oyoqlarini stol ustida chalishtirgancha o`tirardi. U o`zicha agar hozir birortasi xonamga kirib qolsa mening omadli va iqtidorli detektiv ekanligimga shubha qilmaydi va bu fikri noto`g`ri bo`lmaydi deb o`ylardi. Osborn endigina o`ttizga kirgan, bo`yi baland, yuz qiyofasi jiddiy va qora sochlari qalin erkak edi. u o`zining ko`rkam ekanligini bilardi. Uch yillik faoliyatidan so`ng uning xususiy detektiv agentligi shaharda yaxshigina obro`ga ega bo`lgandi. U hali uylanmagan, lekin sevgilisi bor edi. Ko`ngilga soya solib turadigan birgina narsa esa uning sevgilisi turmushga chiqqan ayol ekanligi edi. Xona eshigining uch marta taqillashi uni xayolot olamidan voqelikka qaytardi.
-Kiring,-dedi u oyoqlarini stol ustidan tushirar ekan. Gardishsiz ko`zoynak taqqan, bashang kiyinib olgan, sochlari siyrak o`rta yoshlardagi kishi eshikni ochdi va ichkariga kirib keldi. Detektiv o`rnidan turdi va tashrif buyuruvchi bilan ko`rishdi.
-Marhamat, o`tiring. Men agentlik direktori Markus Osbornman. Xo`sh, xizmat?-U ko`zgu oldida ko`plab marta takrorlab mashq qilgan bu so`zlarni yarim hayajon bilan aytdi.
-Mening ismim Xarold Jons,-dedi tashrif buyuuruvchi past ovozda.-Sizni juda ko`pchilik tavsiya qildi. Mening bir nozikkina muammoim bor, eshitishimcha, sizning agentligingiz ishni judayam ehtiyotkorlik bilan olib borar ekan. Osborn bu so`zlarni eshitib kamtarlik bilan bosh irg`ab qo`ydi. Osbornning yangi mijozi yuzini chetga burdi.
-Taxminimcha, xotinim menga xiyonat qilyapti, ammo bunga to`liq ishonch hosil qilmoqchiman. Uni kuzatishlaringizni istayman... U uydan chiqqach qaerga borishini va kim bilan uchrashishini aniqlab beringlar.
-Sizga to`liq va batafsil malumot beramiz. Malumot qachon tayyor bo`lishi kerak?
-Menimcha, ikki hafta bemalol etsa kerak. Agar bu muddat kamlik qilsa uzoqroq vaqt kuzatishingiz mumkin.
-Ko`ramiz... Lekin menimcha, ikki hafta etarli.
-Yaxshi. Mana bu mening tashrif qog`ozim. Mana bu xatjildda esa xotinimning rasmi va pul bor. Sizlarning xizmatingiz bahosidan xabardorman. Qancha pul ketsa sarflayveringlar.
-Xotiningizning ismi nima?
-Kristin Enn. Osbornning nafasi bo`g`ziga tiqilib qoldi. Kristin Enn uning sevgilisi edi. Bu kishi uning eri ekan-da. U xatjildni ochdi va o`zini bosib olish uchun vaqtdan yutish umidida surat va chekka tikildi. Jons uning bu jiddiyligini ishga zudlik bilan kirishish deb tushundi.
-Ishga jon-jahdingiz bilan kirishadigan odam ekanligingiz ko`rinib turibdi. Kelasi safar ko`rishganimizda menga batafsil malumot berishingizga ishonchim komil. Xayr. Markus nihoyat tilga kirdi.
-Xayr, janob Jons,-dedi u o`rnidan turib, mijozini eshikkacha kuzatib qo`yarkan. Jons ketgach, Markus yana joyiga o`tirdi. U karaxt bo`lib qolgandi. U javonni ochdi va ichidan bir shisha viski bilan stakan oldi. U viskidan quydi va ichkilik ho`plagancha endi nima qilish kerakligini o`ylay boshladi. Uning yangi mijozi Kristin Enning eri. Unchalik ham ko`rimli emas ekan,-o`yladi u.- Kristin u bilan ajrashib menga tegishni istashi bejizga emas ekan. Bundan tashqari, u meni judayam sevadi. U mijoziga haqiqatni etkaza olmasdi. Ammo baribir malumot berishi shart. U ishni agent Skott Palmerga topshirishga va ikki haftalik kuzatuv davomida Kristin Enn bilan uchrashmay turishga qaror qildi. Kristinning eri unga qanday vazifa topshirganini sevgilisiga keyinroq, malumotni berib bo`lgach aytadi. Ular uning ustidan miriqib kulishadi. Ikki haftadan keyin Skott Palmer, o`z ishini chin dildan ado etuvchi yigirma bir yoshli yigit Osbornning xonasiga kirib keldi.
-Jonsning ishini nihoyasiga etkazdim. Ertaga ertalab malumot stolingiz ustida bo`ladi.
-Zo`r! Yana bir narsa. Iltimos, janob Jonsga qo`ng`iroq qilib ertaga ertalab soat o`nda xonamga kelishini aytib qo`y.
-Xo`p. Ertagacha. Ertasiga ertalab Jons Osbornning oldiga kelganida Skott malumot yozishni hali tugatib ulgurmagandi.
-Xayrli tong, janob Jons. O`tiring. Qahva ichasizmi? ,dedi Osborn.
-Yaxshi bo`lardi. Rahmat. Osborn plastik stakanga qaynoq qahva quydi, shakar va qaymoq solib Jonsga uzatdi. Ular endigina qahvadan ho`play boshlashgan paytda xonaga Skott kirdi va Jons bilan ko`rishgach, xo`jayiniga malumot solingan jildni topshirdi. Osborn malumotning asl nusxasini oldi va darhol mijoziga uzatdi. Malumotning ikkinchi nusxasini esa teskari holatda oldiga qo`yib qo`ydi. Jons malumotni bir tuki ham o`zgarmay o`qib chiqdi. U o`qib bo`lgach, Osbornga tikildi va dedi:
-Uchta.
-Kechirasiz?
-Men shu narsadan qo`rqqandim. Atigi ikki hafta ichida uch kishi.
-Nima to`g`risida gapiryapsiz?
-Siz tayyorlagan malumot. Batafsil yozilibdi.
Ikki hafta ichida u uchta erkak bilan uchrashishga ulguribdi. Osborn bu so`zlarni eshitib bir qalqib tushdi. Og`zidagi qahvasi to`g`ri oldidagi malumot yozilgan qog`ozga tushdi.
-Nima? Kechirasiz,-dedi u. U qahva to`kilgan har bir varaqni artgancha malumotni o`qishga kirishdi.
uzbekskoe.biz
(0)
0 / 31© Hikoyalar.Ru
На главную